各位80後Speed dating同單對單約會客人，相信你地都一定覺得呢位嘉賓好熟口面，佢就係前兒童節目主持吱吱鼠伍文生哥哥喇～自從離開TVB後，佢參與到不同工作，其中一樣就係婚禮司儀，大家如果第日結婚都可以搵佢幫手架！

伍文生已經結咗婚14年，講番當日相識經過都幾搞笑，原來係佢外母撮合架～當年伍文生訪問佢外母，言談間覺得呢個後生仔唔錯，所以就介紹咗囡囡俾佢識。最初認識時佢地各自有拍拖，到後期大家變單身後，伍文生覺得佢太太好好、好簡單單純，而且大家有相同信仰，所以就追求對方喇。當時佢太太仲喺澳洲讀書，而且當年通訊唔算好方便，佢地要用電郵或Fax溝通，佢而家諗番起反而覺得呢樣野非常浪漫。

我地有啲單對單約會客人都係處於Long D狀況，拍拖時大家可能會生疑心、擔心對方有誘惑，伍文生教大家，如果你認定咗對方，就要多花心思。換個角度睇，因為唔容易得到，Long D時你可以製造更多浪漫，唔會咁易被誘惑走。至於因為Long D而嗌交，佢就話都要睇番雙方性格，佢就咁多年黎只同太太有過一次激烈討論。

伍文生年輕時因為跟哥哥去劇社而愛上舞台，後來考入藝員訓練班。因為外表年輕，13年以黎佢都係成日飾演學生，為咗有更多體驗，之後佢不斷自薦做兒童節目。最後佢終於成功爭取到，所以我地先會更認識佢，到今日吱吱鼠形象依然深入民心。近年因為當年嘅小朋友觀眾都長大結婚喇，都想搵番佢做婚禮司儀，席上佢成日都會被邀請扮番吱吱鼠合照。佢好感激當年嘅兒童節目日子，因為觀眾成日都會同佢談論當年，令佢即使移民澳洲後都仲同香港有深深嘅連繫。