【明報專訊】土地問題近年已經唔單單牽涉社會同經濟，甚至關乎港人感情生活，究竟係咪有樓先有真愛？無樓嘅你又追唔追到女仔？就住呢啲疑惑，交友公司HK Romance Dating喺4月至5月期間訪問咗342名男士同269名女士，調查單身男女對買樓、樓市嘅睇法，同埋「有樓先結婚」係咪必要條件。
調查結果發現，唔少受訪男女都否認「有樓先結婚」呢個講法，當中有八成男仔就否認，女仔都有65%唔認為呢個係必要條件。不過結婚唔需要啫，有六成男女都仲覺得買樓係人生目標，無論點都要買。問卷又問到，如果你有100萬儲蓄會點使，有三成半男仔會用嚟畀買樓首期，女仔就有成一半人會咁做。所以話，買樓絕對係香港人嘅主要人生大計。
至於講到追求異性，原來有樓真係有優勢，有七成男仔就覺得擁有物業會比較容易識到女仔，而確實又有六成女仔認為異性有樓係會加分，而佢哋都期望另一半「最好有物業」。不過無樓嘅港男又唔需要灰心，交友公司創辦人張惠萍話，有樓只不過會加分，並唔係唯一擇偶條件。同時，女仔都重視男方有無理財同儲錢嘅習慣，個人有無上進心等因素；加上有人生規劃，識策劃將來，就會畀到對方安全感。所以話，只要你夠專一、夠上進、有規劃、識儲錢，一樣識到女仔同你共甘苦。
倡設租管助年輕夫婦儲錢上車
最後，睇到今年節節上升嘅樓價，令八成受訪者都覺得今年樓價係會繼續向上飈，話唔會喺今年內上車。另一位公司創辦人黃嘉如就話，現今年輕夫婦都唔介意同老爺奶奶一齊住，或者喺出邊自己租個細單位住，等儲夠錢、睇定個樓市再上車。所以，佢建議政府應該推出租務管制，遏制租金升幅，幫助年輕夫婦或情侶儲錢上車。
~ HKRD約會集團及Golden Matching創辦人訪問 ~
#真誠有效的配對服務 #單對單約會 #一對一約會 #單身 #singles #one on one dating #matching #golden matching #true love
上一篇：STARSHK UTO娛樂: 男神Jay Lam教你脫獨脫痛
上一篇 Speed Dating 傳媒報導: STARSHK UTO娛樂: 男神Jay Lam教你脫獨脫痛
下一篇 Speed Dating 傳媒報導: 新華網: 香港單身男女：都市里的獨行者